અમદાવાદ ક્રાઇમ બ્રાન્ચની મોટી કાર્યવાહી: સોના-ચાંદીના નામે છેતરપિંડી કરનાર બે આરોપી ઝડપાયા.

ચાંદીના વાસણો બનાવી આપવા અને સારા નફાની લાલચ આપી લોકો સાથે રૂ. ૨૭.૬૮ લાખની છેતરપિંડીનો આક્ષેપ, રૂ. ૯.૦૮ લાખથી વધુનો મુદ્દામાલ કબજે..!!

અમદાવાદ: અમદાવાદ શહેર ક્રાઇમ બ્રાન્ચ દ્વારા સોના-ચાંદીના વ્યવહાર અને બુકિંગના નામે લોકો સાથે વિશ્વાસઘાત અને છેતરપિંડી કરવાના કેસમાં બે આરોપીઓને ઝડપી પાડવામાં આવ્યા છે.

પોલીસ દ્વારા આરોપીઓ પાસેથી સોના-ચાંદીના દાગીના સહિત કુલ રૂ. ૯,૦૮,૯૪૫ની કિંમતનો મુદ્દામાલ કબજે કરી કાયદેસરની કાર્યવાહી હાથ ધરવામાં આવી છે.

પ્રાપ્ત માહિતી અનુસાર, આરોપી ઉમેશ નારાયણદાસ ચેલાણી અને નારાયણદાસ ભુગડોમલ ચેલાણીએ અગાઉથી નક્કી કરેલા કાવતરાના ભાગરૂપે ચાંદીના વાસણો બનાવી આપવાની અને સારો નફો કરાવી આપવાની લાલચ આપી હતી. આ રીતે ફરિયાદી પરષોત્તમ ટીલુમલજી પોમલ, જેઓ સોનીનો વ્યવસાય કરે છે, તેમની પાસેથી ચાંદી તથા ચાંદીની ખરીદીના બુકિંગ પેટે રોકડ રકમ મેળવવામાં આવી હતી. ઉપરાંત, અન્ય સાહેદ પાસેથી સોનાના બિસ્કિટ તથા ચાંદીના બુકિંગ પેટે પણ રૂપિયા લેવામાં આવ્યા હોવાનો ઉલ્લેખ પ્રેસનોટમાં કરવામાં આવ્યો છે.

આરોપીઓએ સોના-ચાંદીના દાગીના બનાવી ન આપ્યા હોવાની તેમજ ફરિયાદી અને સાહેદ પાસેથી મેળવેલી રોકડ રકમ અને સોના-ચાંદી પરત ન કરી વિશ્વાસઘાત અને છેતરપિંડી આચરી હોવાની ફરિયાદના આધારે કાર્યવાહી કરવામાં આવી છે.

પોલીસના જણાવ્યા મુજબ , આ વ્યવહારમાં કુલ રૂ. ૨૭,૬૮,૦૦૦ની કિંમતની સોના-ચાંદીની વસ્તુઓ અને રોકડ રકમ સંકળાયેલી હતી.

આ મામલે ડીસીબી પોલીસ સ્ટેશનમાં વર્ષ ૨૦૨૬માં ભારતીય ન્યાય સંહિતાની કલમ ૩૧૬(૨), ૩૧૬(૫) અને ૬૧ હેઠળ ગુનો નોંધવામાં આવ્યો છે.

પોલીસે ઉમેશ નારાયણદાસ ચેલાણી (ઉંમર ૪૩ વર્ષ) અને નારાયણદાસ ભુગડોમલ ચેલાણી (ઉંમર ૬૬ વર્ષ), બંને રહે. બંગલા નંબર ૬૯, બંગલા એરિયા, કુબેરનગર, સરદારનગર, અમદાવાદ શહેર,ની ધરપકડ કરી આગળની કાયદેસરની કાર્યવાહી હાથ ધરી છે.

અમદાવાદ શહેર ક્રાઇમ બ્રાન્ચની આ કાર્યવાહીના પગલે સોના-ચાંદીના વ્યવહારમાં નફાની લાલચ આપી છેતરપિંડી કરતા તત્ત્વો સામે પોલીસની કાર્યવાહી ફરી ચર્ચામાં આવી છે.