ભરૂચ, શુક્રવાર: ભરૂચ-વાગરા ઇન્ડસ્ટ્રીયલ વિસ્તારમાં આવેલા મેજર હેઝાર્ડ આઇડેન્ટિફાઇડ (MAH) યુનિટ્સમાં સલામતીના નિયમોનું કડક પાલન થાય તે હેતુથી દહેજ ઇન્ડસ્ટ્રીયલ એસોસિએશન (DIA) ખાતે સમીક્ષા બેઠક યોજાઈ હતી.
DIAના ચેરમેન એમ. એન. મનાણી તથા ફેક્ટરી ઇન્સ્પેક્ટર વી. એ. હળવદિયાના સંયુક્ત અધ્યક્ષસ્થાને યોજાયેલી બેઠકમાં ઔદ્યોગિક એકમોના પ્રતિનિધિઓ સાથે ઇમરજન્સી વ્યવસ્થાપન અને સલામતી અંગે ચર્ચા કરવામાં આવી હતી.
બેઠકમાં ઔદ્યોગિક અકસ્માત કે ઇમરજન્સીની સ્થિતિમાં આસપાસના કારખાનાઓ વચ્ચે મ્યુચ્યુઅલ એઇડ વ્યવસ્થા વધુ મજબૂત બનાવવા ભાર મૂકાયો હતો. સાથે જ ફેક્ટરીઓની આસપાસના ગામોમાં જોખમો અને સલામતી અંગે જાગૃતિ ફેલાવવા અવેરનેસ પ્રોગ્રામ યોજવા સૂચના આપવામાં આવી હતી.
આગામી દિવાળી વેકેશન દરમિયાન કારખાનાઓમાં પૂરતો ટેકનિકલ અને સુરક્ષા સ્ટાફ ઉપલબ્ધ રહે તથા સિક્યુરિટી કર્મચારીઓને ઇમરજન્સી કામગીરી અંગે યોગ્ય તાલીમ આપવામાં આવે તે અંગે પણ માર્ગદર્શન અપાયું હતું.
દિવાળી વેકેશન શરૂ થાય તે પહેલાં તમામ MAH યુનિટ્સમાં સેફ્ટી મોકડ્રિલ યોજવા તાકીદ કરવામાં આવી હતી. ઉપરાંત, સરકારી તંત્ર દ્વારા આગામી દિવસોમાં સંયુક્ત સ્તરે વ્યાપક મોકડ્રિલ યોજવા અંગે પણ આયોજન કરવામાં આવ્યું હતું.
બેઠકમાં ભરૂચ-વાગરા ઇન્ડસ્ટ્રીયલ બેલ્ટના વિવિધ MAH એકમોના પ્રતિનિધિઓ અને ઉદ્યોગપતિઓ ઉપસ્થિત રહ્યા હતા.
Leave a Reply