ચીખલીમાંથી રૂ.10.20 લાખનો વિદેશી દારૂ ઝડપાયો.

સ્ટેટ મોનિટરિંગ સેલની ટીમે દરોડો પાડી કુલ રૂ.30.40 લાખનો મુદ્દામાલ કબજે કર્યો.

ચીખલી: નવસારી જિલ્લાના ચીખલી પોલીસ સ્ટેશન હદ વિસ્તારમાં સ્ટેટ મોનિટરિંગ સેલની ટીમે દરોડો પાડી રૂ.10.20 લાખની કિંમતનો ભારતીય બનાવટનો વિદેશી દારૂ અને બીયરનો જથ્થો ઝડપી પાડ્યો હતો.

મળતી માહિતી મુજબ, મલીયાધારા ગામની સીમમાં અટગામથી ચીખલી તરફ આવતા રોડ પર દરોડો પાડવામાં આવ્યો હતો. દરોડા દરમિયાન આશરે 120 પેટી દારૂ/બીયર, કુલ 4,484 બોટલ મળી આવી હતી. દારૂની કિંમત રૂ.10,20,960 હોવાનું સામે આવ્યું છે. અન્ય મુદ્દામાલ સહિત કુલ રૂ.30,40,960નો મુદ્દામાલ કબજે કરવામાં આવ્યો હતો.

દરોડા દરમિયાન પોલીસે બે આરોપીઓ—જીતુ ઉર્ફે યતીન કિશોરભાઈ રાઠોડ અને મીત ઉર્ફે મીતલો નટવરભાઈ માહ્યાવંશીને ઝડપી પાડ્યા હતા. જ્યારે છ આરોપીઓને વોન્ટેડ જાહેર કરવામાં આવ્યા છે.

આ મામલે ચીખલી પોલીસ સ્ટેશનમાં પ્રોહિબિશન એક્ટની વિવિધ કલમો તથા ભારતીય ન્યાય સંહિતા-2023 હેઠળ ગુનો નોંધવામાં આવ્યો છે અને વધુ તપાસ હાથ ધરવામાં આવી છે.