નરોડામાં યુવતીને દસમા માળેથી ફેંકી હત્યાની કોશિશ, એક આરોપી ઝડપાયો..

અમદાવાદના નરોડા વિસ્તારમાં યુવતીને દસમા માળેથી નીચે ફેંકી હત્યાની કોશિશ કરવાના ચકચારી ગુનામાં અમદાવાદ શહેર ક્રાઇમ બ્રાન્ચે એક આરોપીને ઝડપી પાડ્યો છે.

પોલીસની પ્રેસનોટ મુજબ, તા. 17 ઓગસ્ટ, 2026ના રોજ નરોડા વિસ્તારમાં ફરિયાદીની દીકરીને આરોપીઓ રાહુલ, સુરેશચંદ્ર અને દિનેશ દ્વારા ભેગા મળી તેનો ફોન નંબર માંગવામાં આવ્યો હતો. યુવતીએ નંબર આપવાનો ઇનકાર કરતાં ત્રણેયે તેની છેડતી કરી હતી અને જાનથી મારી નાખવાના ઇરાદે તેને પકડી નરોડા-મુઠીયા સ્થિત શ્યામ ઉપવનની નવી બની રહેલી સ્કીમના દસમા માળેથી સીડી મારફતે નીચે ફેંકી દીધી હતી. યુવતી લિફ્ટની જગ્યામાં પડતાં તેને શરીરે ગંભીર ઇજાઓ થઈ હતી.

આ મામલે નરોડા પોલીસ સ્ટેશનમાં બી.એન.એસ.ની કલમ 109(1), 75(2), 117(2), 54 તથા પોક્સો એક્ટની કલમ 7 અને 8 મુજબ ગુનો નોંધાયો હતો. ઘટનાની ગંભીરતાને ધ્યાનમાં લઈ ક્રાઇમ બ્રાન્ચે ઘટનાસ્થળની મુલાકાત લઈને આસપાસના સીસીટીવી ફૂટેજ તપાસ્યા હતા. સીસીટીવીના આધારે પોલીસે ગુનામાં સંડોવાયેલા એક આરોપીને નરોડા તળાવ પાસેથી ઝડપી પાડ્યો હતો અને તેને નરોડા પોલીસને સોંપવાની કાર્યવાહી હાથ ધરી હતી.

ઝડપાયેલ આરોપીની ઓળખ સુરેશચંદ્ર સોહનલાલ ચરપોટા તરીકે થઈ છે. તે મૂળ રાજસ્થાનનો રહેવાસી હોવાનું પ્રેસનોટમાં જણાવાયું છે.