દિલ્હી જામીયાનગરની ચોરીનો અનડીટેક્ટ ગુનો અમદાવાદ ક્રાઈમ બ્રાન્ચે ઉકેલ્યો..

અમદાવાદ: અમદાવાદ ક્રાઈમ બ્રાન્ચે દિલ્હી જામીયાનગર પોલીસ સ્ટેશન વિસ્તારમાં મે-2026 દરમિયાન થયેલી ચોરીના અનડીટેક્ટ ગુનાનો ભેદ ઉકેલી આરોપીને ઝડપી પાડ્યો છે.

મળતી માહિતી મુજબ, દિલ્હીના જામીયાનગર વિસ્તારમાં આવેલા બાટલા હાઉસ ખાતે બપોરના સમયે તિજોરીની ચાવી બનાવી આપવાના બહાને સોના-ચાંદીના દાગીના તેમજ રોકડ રકમની ચોરી કરવામાં આવી હતી. આ અંગે જામીયાનગર પોલીસ સ્ટેશનમાં ગુનો નોંધાયો હતો.

ગુનાની તપાસ દરમિયાન અમદાવાદ ક્રાઈમ બ્રાન્ચે આરોપી કિર્તિપાલસિંહ સરદારસિંહ ચીખલીગર (ઉંમર 42 વર્ષ), રહે. વડોદરા,ને નારોલ સર્કલ નજીક અસલાલી તરફ જવાના બસ સ્ટેન્ડ પાસેથી ઝડપી લીધો હતો. આરોપીને વધુ કાર્યવાહી માટે દિલ્હી જામીયાનગર પોલીસને સોંપવાની તજવીજ હાથ ધરવામાં આવી છે.

પોલીસના જણાવ્યા મુજબ, પકડાયેલા આરોપી વિરુદ્ધ દિલ્હીના અલગ-અલગ પોલીસ સ્ટેશનોમાં ચોરીના 10 ગુનાઓ નોંધાયેલા છે. ઉપરાંત, તેલંગાણાના હૈદરાબાદ શહેરમાં પણ ચોરીના ગુનામાં આરોપી ઝડપાઈ ચૂક્યો હોવાનું સામે આવ્યું છે.