વાઈબ્રન્ટ ગુજરાત સમિટ-2027ને લઈ મુંબઈમાં ઉદ્યોગપતિઓ સાથે મુખ્યમંત્રીની વન-ટુ-વન બેઠક.

મુંબઈ: વાઈબ્રન્ટ ગુજરાત સમિટ-2027ને અનુલક્ષીને મુખ્યમંત્રી ભૂપેન્દ્ર પટેલે મુંબઈ ખાતે દેશના અગ્રણી ઉદ્યોગપતિઓ સાથે વન-ટુ-વન બેઠક યોજી હતી.

મુખ્યમંત્રીએ ઉદ્યોગપતિઓને ગુજરાતમાં રોકાણની વિવિધ તકો અંગે ચર્ચા કરી વાઈબ્રન્ટ ગુજરાત સમિટ-2027માં ભાગીદાર બનવા આહવાન કર્યું હતું.બેઠક દરમિયાન મહિન્દ્રા ગ્રુપના આનંદ મહિન્દ્રાએ ગુજરાતમાં ઈલેક્ટ્રિક વાહન અને GIFT સિટી ક્ષેત્રે તકો અંગે ફળદાયી ચર્ચા થઈ હોવાનું જણાવ્યું હતું. તેમણે ગુજરાતમાં રોકાણ અંગે અગાઉ નરેન્દ્ર મોદી સાથે થયેલી બેઠકને યાદ કરી ગુજરાતની દુરંદેશી નીતિઓની પ્રશંસા કરી હતી.

સ્વાન કોર્પોરેશનના એમડી નિખિલ મર્ચન્ટે ગુજરાતની શિપિંગ પોલિસીને સરાહનીય ગણાવી કંપનીના વિસ્તરણ અને આધુનિકીકરણ અંગે ચર્ચા થઈ હોવાનું જણાવ્યું હતું. કંપનીના આંતરરાષ્ટ્રીય વ્યવસાયને વધુ વેગ આપવા કનેક્ટિવિટી અને એરપોર્ટ ઈન્ફ્રાસ્ટ્રક્ચર અંગે પણ ચર્ચા થઈ હતી.વેલ્સપન ઇન્ડિયાના સીઈઓ દીપાલી ગોએન્કાએ ગુજરાતના મજબૂત ટેક્સટાઇલ ઇકોસિસ્ટમ અને ઉદ્યોગલક્ષી નીતિઓની પ્રશંસા કરી હતી.

રાજ્યમાં નવા રોકાણ અને વિસ્તરણ દ્વારા ઉત્પાદન, નિકાસ અને રોજગારીને વેગ આપવાની તકો અંગે ચર્ચા થઈ હતી.હિન્ડાલ્કોના એમડી સતિષ પાઈએ ગુજરાતમાં કોપર રિસાયક્લિંગ, ઈ-વેસ્ટ મેનેજમેન્ટ અને સર્ક્યુલર ઈકોનોમી ક્ષેત્રે રહેલી તકો અંગે ચર્ચા થઈ હોવાનું જણાવ્યું હતું. ડિસેમ્બરમાં કોપર રિસાયક્લિંગ પ્લાન્ટના ઉદ્ઘાટન અંગે પણ ચર્ચા થઈ હતી.

AMNS ઈન્ડિયાના સીઈઓ અમિત હરલાલકાએ ગુજરાતમાં કંપનીની મહત્વાકાંક્ષી રોકાણ યોજનાઓ અંગે માહિતી આપી હતી. કંપની જૂન સુધીમાં રૂ. 80 હજાર કરોડનું રોકાણ પૂર્ણ કરવાની દિશામાં આગળ વધી રહી છે. હજીરા ખાતે પુનઃપ્રાપ્ય ઊર્જા અને બેટરી સ્ટોરેજ ક્ષેત્રે વધુ રૂ. 10 હજાર કરોડના રોકાણની યોજના છે. સાથે જ ગુજરાતમાં 25 મિલિયન ટન વાર્ષિક ક્ષમતા ધરાવતો વિશ્વનો સૌથી મોટો સ્ટીલ પ્લાન્ટ વિકસાવવાના વિઝન અંગે પણ ચર્ચા થઈ હતી.

મુંબઈમાં યોજાયેલી આ વન-ટુ-વન બેઠકો દરમિયાન ગુજરાતને અગ્રણી રોકાણ સ્થળ તરીકે વધુ મજબૂત બનાવવા માટે વિવિધ ઉદ્યોગ ક્ષેત્રોમાં રોકાણ, સહયોગ, વિસ્તરણ અને નવી ઔદ્યોગિક તકો અંગે મહત્વપૂર્ણ ચર્ચાઓ થઈ હતી.