વડોદરા શહેરના બાપોદ પોલીસ સ્ટેશન હદ વિસ્તારમાં દારૂના કટિંગ અંગે સ્ટેટ મોનિટરિંગ સેલની ટીમે દરોડો પાડી વિદેશી દારૂ-બીયરનો મોટો જથ્થો ઝડપી પાડ્યો હતો.
ન્યૂ કરેલીબાગ રોડ પર ખોડિયારનગર સફેદ વુડાના મકાન પાછળ આવેલા નીલકંઠ વિલા ફ્લેટના પાર્કિંગમાં આ કાર્યવાહી કરવામાં આવી હતી.દરોડા દરમિયાન ભારતીય બનાવટના વિદેશી દારૂ અને બીયરની આશરે 470 પેટી, કુલ 16,394 બોટલ તથા રૂ.84,01,258ની કિંમતનો દારૂનો જથ્થો મળી આવ્યો હતો. ઉપરાંત ત્રણ ફોર-વ્હીલર વાહન અને એક જ્યુપિટર મોપેડ સહિત કુલ રૂ.1,00,21,258નો મુદ્દામાલ કબજે કરવામાં આવ્યો હતો.
આ મામલે બાપોદ પોલીસ સ્ટેશનમાં પ્રોહિબિશન એક્ટની વિવિધ કલમો હેઠળ ગુનો નોંધવામાં આવ્યો છે. પોલીસે કુલ સાત આરોપીઓને વોન્ટેડ જાહેર કર્યા છે. જેમાં નીલેશ ઉર્ફે નીલુ હરેશભાઈ નાથાણી સહિત વાહનોના માલિકો, સ્થળ પર દારૂનો જથ્થો ઉતારનાર અને દારૂનો જથ્થો મોકલનારનો સમાવેશ થાય છે.
સ્ટેટ મોનિટરિંગ સેલની આ કાર્યવાહી રાજ્યમાં ગેરકાયદેસર દારૂ અને જુગારની પ્રવૃત્તિઓ સામે કાયદેસરની કાર્યવાહી કરવા આપવામાં આવેલી સૂચનાના અનુસંધાને કરવામાં આવી હોવાનું પ્રેસનોટમાં જણાવાયું છે.
Leave a Reply